"Абалы кайра начарлады". Азиз Мурадиллаевге башка өлкөдөн операция жасала турган болууда
Ооруканада жаткан Азиз Мурадиллаевдин абалы начарлады. Мындан улам анын үй-бүлөсү башка өлкөгө алып кетүү чечимин кабыл алды дейт Ассоль Молдокматова.
Анын айтымында, актёрго донор боло турган адам тууганчылыгын ырастаган комиссиядан өтүшү керек. Ал эми комиссия болжол менен 30-декабрда болот экен.
"Андан кийин дагы бир катар анализдерди тапшыруу зарылдыгы бар экен. Бул процесс көп убакыт алат. Алар көпкө күтө алышпайт. Азиздин абалы кайра начарлап кеткендиктен үй-бүлөсү 14-декабрда башка өлкөгө учуп кетүүнү чечишти. Убакыт дээрлик жок. Эгерде бейтап менен донор боло турган адамдын органдарынын шайкештиги тастыкталса, анда 1-2 күндө учушат", -
деп жазат коомдук ишмер.
Белгилесек, 3-декабрда актёр оор абалда ооруканага түшүп, ага кайрадан боордун циррозу диагнозу коюлган. Анын боорун алмаштыруу керек болуп, операцияга 45 миң доллар кажет экени кабарланган.
Кийинчерээк атайын эсеп ачылып, кайрымдуу жарандардан 3 миң доллардан ашык каражат топтолгон. Ассоль Молдокматованын демилгеси, кайрылуусунан кийин президент Садыр Жапаров актёрдун операциясына 42 миң доллар берген.
13-декабрда Азиз Мурадиллаев ооруканадан кайрылуу жасап, элге, президентке ыраазычылыгын айтты.
