КМШ өлкөлөрү качкын коррупционерлерди бири-бирине өткөрүп беришет

Казакстандын Астана шаарында КМШ өлкөлөрүнүн башчылары коррупцияга каршы күрөшүү боюнча кызматташуу келишимине кол коюшту. Ага ылайык, кеңешке мүчө өлкөлөр качкын коррупционерлерди бири-бирине өткөрүп беришет деп жазылат Казакстандын Коррупцияга каршы кызматынын расмий сайтында.

Маалыматта Казакстандын Коррупцияга каршы күрөшүү кызматы кеңешке мүчө-өлкөлөрдүн компетенттүү органдары жана КМШнын Аткаруу комитети менен бирдикте коррупцияга каршы аракеттенүү боюнча кызматташуусу жөнүндө макулдашуунун долбоорун иштеп чыкканы айтылат. Келишимге 14-октябрда Астана шаарында кол коюлган.

Кол коюлган келишим төмөнкүлөргө мүмкүндүк берет:

• коррупциялык кылмыш иштери боюнча жардам көрсөтүүгө;
• коррупциялык кылмыштар боюнча макулдашылган ыкчам-иликтөө, ыкчам-профилактикалык иш-чараларды жана атайын операцияларды жүргүзүүгө;
• коррупциялык кылмыштарды жасаган адамдарды издөө, кармоо жана экстрадициялоо, коррупциядан алынган кирешелерди кайтаруу жаатында кызматташууга;
• коррупцияга каршы аракеттенүү жаатында маалыматтык системаларды түзүүгө жана пайдаланууга;
• коррупцияга каршы аракеттенүүдө кызматташуунун стратегияларын, программаларын жана пландарын иштеп чыгууга;
• коррупцияга каршы мониторингдин жыйынтыктары менен алмашууга;
• кызматкерлердин тажрыйбасын жогорулатууга.