Токмоктогу мал базарда аксакалдын 120 миң сомун уурдоого шектүү аныкталды
Токмок шаарындагы мал базарда аксакалдын 120 миң сомун уурдоого шектүү колго түшүрүлдү. Чүй ОИИББдин маалымат кызматынан билдиришкендей, 39 жаштагы жаран келтирилген чыгымды толук төлөп берди.
Маалым болгондой, окуя 16-октябрда саат 09:00 чамасында болгон. Анда мал базарда жүргөн 79 жаштагы аксакалдын 120 миң сомун уурдап кетишкен. Базардагы кайдыгер эмес адамдар акча чогултуп, карыяга беришкен.
Бул факты боюнча Токмок ШИИБи тарабынан сотко чейинки териштирүү иштери башталган. 17-октябрда жабырлануучунун үйүнө милиция кызматкерлери барышып, окуянын чоо-жайын такташкан. Анда аксакал уулунун ашына мал алайын деп базарга барганын, белгисиз адамдар акчасын уурдап кеткенин айтып арыз жазган.
Арыздын негизинде "уурулук" беренеси менен кылмыш иши козголуп, тергөө иштеринин жүрүшүндө 39 жаштагы Токмок шаарынын тургуну шектүү катары кармалды.
Шектүү учурда Токмок шаарынын убактылуу кармоочу жайында.
Кармалган адам келтирилген зыяндын ордун толтуруу максатында тергөө органдары аркылуу 120 миң сом которду. Тергөө иштери улантылууда.
