Чүйдө дайынсыз делинген жарандын сөөгү ата-энесинин короосуна көмүлгөнү аныкталды
Чүйдө ыкчам кызматкерлер дайынсыз делинген жарандын сөөгүн жерге көмүлгөнүн аныкташты. Бул туурасында облустук ички иштер башкы башкармалыгынан билдиришти.
Маалым болгондой, 1987-жылы туулган келин милицияга кайрылып жолдошу дайынсыз болуп жатканын айткан. Анда жолдошу 8-сентябрда үйүнөн чыгып кеткен бойдон кайра келбегенин билдирген.
Миилция кызматкерлери текшерүү жүргүзүп, анда изделип жаткан И.Р. Ысык-Ата районунун аймагынан чыкпаганын, ал Чоң-Далы айылындагы ата-энесинин үйүно барганын аныкташкан. Териштирүү иштеринин алкагында изделип жаткан жарандын сөөгү ата-энесинин короосунда жерге көмүлгөнү такталды.
Кылмышка шектелип маркумдун 59 жаштагы атасы кармалып, убактылуу кармоочу жайга киргизилди. Тергөөнүн алдын ала версиясы боюнча, кылмыш үй-бүлөлүк чырдын негизинде, ата баланын мушташы учурунда жасалган. Учурда тергөө иштери улантылып жатат.
