Үч мас милиция кызматкерин сабашты. Шектелүүчүлөр камакка алынды
Панфилов районунда укук коргоо органдарына кол салды деп шектелген жарандар кармалды. Мындй маалыматты Чүй облусунун ОИИБси берди.
2021-жылдын 16-февраль күнү Панфилов РИИБнүн нөөмөт бөлүмүнө Чалдовар айылындагы эсепке алуу постунда милиция кызматкерине кол салуу болгондугу тууралуу билдирүү түшкөн. Аталган маалыматты алган соң дароо ыкчам-тергөө кызматты чыккан.
16-февраль күнү, болжол менен саат 16:00 чамасында, мас абалындагы белгисиз адамдар эч себепсиз ошол жактагы кызматын өтөп жаткан кызматкерди ур-токмокко алып окуя болгон жерден качып кеткендиги белгилүү болгон.
Бул факты кылмыштардын жана жоруктардын бирдиктүү реестрине Кыргыз Республикасынын Жазык Кодексинин 266-беренеси (Бейбаштык) боюнча катталып, сотко чейинки өндүрүш иштери башталган. Кылмыштын бетин ачуу максатында Панфилов РИИБнүн криминалдык милиция кызматы тарабынан бир топ ыкчам издөө иш-аракеттери жүргүзүлгөн.
Натыйжасында 18-февраль күнү бул кылмышка тиешеси бар 2000-жылы туулган К.Н. кармалып, убактылуу кармаочу жайга камакка алынган. Кийин дагы эки шектүү 1999-жылы туулган Т.А., жана К.А., адамдар кармалып, тергөө иш амалдарын жүргүзүү үчүн тергөө кызматына жеткирилген.
Учурда бардык керектелүүчү экспертизалар дайындалган. Тергөө иш амалдары улантылууда.
