Аялын муунтуп өлтүрүп, үйдүн короосуна көмүп салган
Сузак районунда жергиликтүү тургун кызганычтан улам аялын сабап, муунтуп өлтүрүп, андан соң сөөгүн үйдүн короосуна көмүп салган. Бул тууралуу Жалал-Абад облустук ички иштер башкармалыгынын басма сөз кызматы билдирди.
Маалым болгондой, 23-июнь күнү саат 21:40та Сузак райондук ички иштер бөлүмүнүн нөөмөт бөлүмүнө жергиликтүү тургун Б., телефон чалып, аялын уруп өлтүргөнүн билдирген. Киров айылынын 31 жаштагы тургуну 22-июндан 23-июнга караган түнү кызганычтын айынан 25 жаштагы аялын колу менен муунтуп, андан соң үйдүн короосуна көмүп салганы аныкталган.
Короонун түштүк-батыш тарабында аялдын жансыз денеси табылып, андан соң алар соттук-медициналык экспертизадан өткөрүү үчүн адистерге өткөрүлүп берилди.
Бул факты боюнча "Адам өлтүрүү" беренеси боюнча кылмыш иши козголду. Шектүүнүн өзү Сузак РИИБнин убактылуу кармоочу жайына киргизилген. Тергөө жүрүп жатат.
