Уюштуруучу: Бул митинг Россиядагы мигранттарды колдоо максатында уюштурулган
Бүгүн, Бишкектеги Горький паркында Россияны колдоо акциясы өттү. Митингди Кубанычбек Бейшенбек уулу уюштурган. Редакция ага чалып, комментарий алды.
"Бул акция Россияда жүргөн мигранттарды колдоо боюнча тынчтык митинги болушу керек болчу. Бирок митингде чагымчыл учурлар болду. Мага мэриядан чалып, ал жердеги балдар боюнча айтышты, артынан барганга үлгүрбөй калдым. Мен сизден Рамзан Кадыровдун сүрөтү бар экенин билдим, мунун баарын провокация деп эсептейм",-деди Кубанычбек Бейшенбек уулу Kaktus.media сайтына.
Буга чейин Factcheck.kg маалымат булактары концертти Event Deluxe агенттиги уюштурганын жазып чыгышкан. Анын башкы директору жана негиздөөчүсү Салкынай Воинова экенин osoo.kg маалымат базасы билдирди.
Event агенттиги 2012-жылдан бери иштеп келет. 2013-2014-жылдары ишкана мамлекеттик заказдарды алган – анын жалпы суммасы 41,7 млн сомду түзгөн. Бирок 2016-жылдан бери компания салык төлөбөй, мамлекеттик тендерлерден ута элек.
Кийинчерээк Салкынай Воинова өзүнүн Instagram баракчасына митингди уюштурууга эч кандай тиешеси жок экенин билдирген.
"Концерттин уюштуруучусу мен деген маалыматты жокко чыгаргым келет. Менден артисттердин байланыш номерлерин берүүмдү гана суранышты", - деди ал.
Воинова мындан ары иш-чара тууралуу эч кандай маалыматы жок экенин баса белгиледи. Ал ошондой эле Кубанычбек Бейшенбек уулунун атынан мэрияга жөнөтүлгөн билдирүүнүн сүрөтү менен бөлүштү.
