Аялды өз үйүндө өлтүрө сабаган. Күйөсү милиция кызматкери
Кечээ, 28-декабрда, Талас шаарында аялдын жансыз денеси өз үйүнөн табылды. Маалым болгондой, анын жанында күйөсү болгон. Ал милиция кызматкери. Бул тууралуу Kaktus.media редакциясына күч түзүмдөрүнүн кызматкерлери билдиришти.
Алдын ала маалыматтар боюнча, 1994-жылы туулган аялдын жансыз денесинде ур-токмоктун издери бар.
Маалым болгондой, күйөөсү үйгө тез жардам чакырган. Дарыгерлер көрсөтүлгөн дарекке барып, келин каза болгонун аныкташкан.
Такталбаган маалыматтарга караганда, маркумдун күйөөсү Талас ОИИБнин жол коопсуздугун камсыздоо бөлүмүндө иштейт жана ал аялын ур-токмокко алган. Ал акыл-эсин жоготуп койгондо гана тез жардам чакырган.
Талас облусунун ички иштер башкармалыгынын басма сөз кызматы аялдын өлүмү боюнча маалымат берүүдөн баш тартты. Кошумчалай кетсек, азырынча башка шектүүлөр жок.
Башкы беттеги сүрөт иллюстративдүү.
