БШКнын имаратынын жанына бир нече партиянын өкүлдөрү митингге чыгышты (фото, видео)
Бүгүн, 1-декабрда партиялар шайлоонун алдын ала жыйынтыгы менен макул эместигин билдирип, кайрадан БШКнын алдына чогулушту.
Ага "Ата Мекен", "Улуттар биримдиги", "Кыргызстан жашылдар", "Азаттыктын" партиялары жана башкалардын өкүлдөрү чогулду.
Партия өкүлдөрүнүн айтымында, алардын байкоочулары дагы эле добуштарды кол менен саноого кире албай жатышат, ошондуктан бул процесстин ачык-айкындыгынан да күмөн санашат.
"Кол менен эсептөөдө да ачык-айкындуулук болбой эле. Системанын ар дайым кандайдыр бир мүчүлүштүктөргө дуушар болушу да буга себеп. БШК улам-улам бул боюнча өтө жөнөкөй жана күлкүлүү түшүндүрмөлөрдү берип келет. Белгилүү бир картина түзүлбөй жатат. Өзүңүздөр көрдүңүздөр аткаминерлердин, ар биринин өзүнүн версиясы болду. Алардын эч кимиси жоопкерчиликти мойнуна албай жатат, бул кадимки жасалмалуулук же манипуляция", - деди Клара Соронкулова.
Алар добуш берүүнүн жыйынтыгын жокко чыгарууну жана шайлоону жараксыз деп табууну талап кылышууда.
Эске сала кетсек, 28-ноябрда алдын ала эсептөө учурунда система бузулуп, андан кийин жыйынтыктар өзгөргөн. Кээ бир партиялар, анын ичинде "Ата Мекен" партиясы он миңдеген добушун жоготконун айтууда. Партиялар фальсификацияларды жарыялап, шайлоону тааныбай, 28-ноябрдагы шайлоонун жыйынтыгын жокко чыгарууну талап кылышты.
БШК система туура иштеп жатканын билдирди. Бирок, БШКнын кызматкеринин айынан шайлоо маалыматтык тутумунун сайтында маалыматтарды көрсөтүүдө ката кетти. Бул ишти Улуттук коопсуздук боюнча мамлекеттик комитети иликтеп жатат.
