УКМК шайлоочуларга пара берди деген шек менен "Эмгек" партиясынын өкүлүн кармады
10-июлда УКМК кызматкерлери Бишкек шаарынын Ленин районунун МТУ-2 айылынын жашоочуларына акча бөлүштүрүп жаткан жеринен Эмгек партиясынын К.Э.А. аттуу өкүлүн кармашты.
УКМКнын маалыматы боюнча, тергөө учурунда партиянын өкүлү "Эмгек" партиясынан талапкер Р.Т. уулунун көрсөтмөсү менен МТУ-2нин жашоочуларына ар бир катталган шайлоочуга 1000 сом өлчөмүндө акча каражатын таркаткандыгы аныкталды.
Жеке текшерүү учурунда К.Э.А, ошондой эле, бөлүштүрүү үчүн арналган 10 миң сомду, ошондой эле акча каражаттарын алгандыгы жөнүндө жазуусу бар шайлоочулардын тизмесин тапкан.
Учурда УКМК тарабынан тиешелүү тергөө-оперативдик иш-чаралар улантылууда. Сотко чейинки процесстер Кыргыз Республикасынын Кылмыш-жаза кодексинин 192-беренеси "Добуштарды сатып алуу" боюнча катталган.
Белгилей кетсек, "Эмгек" партиясынын тизмесинде Р.у.Т. деген баш тамгалар Рысбек уулу Талантбек (№ 20) деп жазылган.
