Нуржигит Кадырбеков депутаттык мандатын тапшырат
Жогорку Кеңештин депутаты Нуржигит Кадырбеков мандатын тапшыруу боюнча арыз жазды. Бул тууралуу Kaktus.media сайтына Борбордук шайлоо комиссиясынан билдиришти.
БШК мүчөлөрүнүн айтымында, арыз бүгүн, 30-августта берилди. Арыз Борбордук шайлоо комиссиясынын жыйынында каралат.
Мандат "Ыйман Нуру" партиясынын тизмеси боюнча кийинки талапкер Эрнис Айдаралиевге өтүшү мүмкүн.
Нуржигит Кадырбеков өзү социалдык тармактагы баракчасына: "Алла Таалам көрүп турат. Эң негизгиси башкаларга зыяныбыз тийбесин", - деген билдирүү калтырды.
Эске салсак, ушул жылдын 22-июлунда Каржы министрлигине караштуу ички аудит кызматы буга чейин Кадырбеков жетектеп келген "Ыйман" фондунун ишмердүүлүгүн текшерүүгө алган.
Аудиттин маалыматы боюнча, 2014-2015-жылдары "Ыйман" фондуна 5 миллион 104 миң 524 доллар түшкөн. Анын 4 миллион 999 миң 674 доллары Түркиянын Маданият министрлигине караштуу Кызматташтык жана координация агенттиги тарабынан диний билим берүүнү тартипке келтирүү максатында которулган. Мындан тышкары 2014-2018-жылдары фонддун эсеби ар кандай каражаттар жана жеке адамдар тарабынан которулган 24 миллион 866 миң 512 сомго толукталган.
