Сокулукта 2 млн сомдон ашык акча сакталган сейф уурдалган. Шектүүлөр табылды
Чүйдүн Сокулук районунун Фрунзе айылындагы "Б-Д" агро-маркетинин кеңсенинен сейф уудалган. Анда 2 млн сомдон ашык каражат болгон дешет облустук ички иштер башкармалыгынан.
Маалым болгондой, 27-апрелде М.Д. аттуу жаран милицияга кайрылып, ошол эле күнү таңкы саат 04:00 чамасында агро-маркеттин кеңсенине белгисиз адамдар кирип, 2 миллион сомдон ашык акча каражаты бар темир сейфти уурдап кеткенин билдирген.
Аталган факты боюнча "Уурдоо" беренеси менен кылмыш иши козголгон.
Тергөөнүн жүрүшүндө 1979-жылы туулган Э.Ж. жана 1986-жылы туулган Б.А. аттуу жарандар аныкталып, Ош шаарынын аймагында кармалышты. Шектүүлөр кылмыш кылгандан кийин Ош шаарына изин жашырышкан.
Кармалгандардын бири - Б.А. аттуу жаран 2023-жылдын июль айында Токмок шаарындагы ишканалардын биринен 60 миң доллар жана 1 млн 500 миң сом акча каражатын уурдоого тиешеси бар экендиги аныкталып издөөдө жүргөн.
Ошондой эле тергөө иштеринин жүрүшүндө Б.А. аттуу жаран уюшкан кылмыштуу топтун мүчөсү катары ИИМдин катоосунда тургандыгы аныкталды.
