Коомдук транспорттордо жол кире канча сомго көтөрүлөрү айтылды
Мэрия коомдук транспортто жол кирени 22 сомго чейин көтөрүүнү карап жатат. Бул тууралуу Kaktus.media сайтына вице-мэрдин милдетин убактылуу аткаруучу Максатбек Сазыкулов билдирди.
Сазыкуловдун айтымында, учурда бир жүргүнчүнүн жол кире акысы 18 сомдун тегерегинде. Андыктан муниципалдык транспорттун иши өзүн актап, автопаркты андан ары жаңылоого кирешени камсыз кылуу үчүн тарифти жогорулатуу керек.
Учурда мэрия тарифти 20-22 сомго чейин көтөрүүнү карап жатат. Бир аз убакыт өткөндөн кийин инфляция талап кылса, кайра каралышы мүмкүн.
"Азыр жөнгө салуучу таасири талданып жатат, балким, декабрь айына чейин маселе чечилет. Инфляцияны эске алуу керек. Бул көрсөткүч каалаган тарифте болушу керек жана жок дегенде муниципалдык транспорттун иши өзүн акташы үчүн тарифти инфляцияга ылайыкташтыруу керек", - деди ал.
Сазыкулов белгилегендей, кеп муниципалдык транспорт – автобустар менен троллейбустардагы тарифтер жөнүндө гана болуп жатат. Бирок ал тариф бардык шаардык транспортто, башкача айтканда маршруттук таксилерде да бирдей болушу керек деп эсептейт.
"Тариф бирдей болушу керек. Жаңы автобустардын келиши менен кичи автобустар шаардын четине чыгып, шаарда чоң сыйымдуулуктагы транспорт – троллейбустар жана жаңы автобустар гана калат. Азырынча маршруттук таксилерде жол кире кандай болорун айта албайм, анткени кожоюндары кайрылган эмес. Бирок азыркы тарифтен төмөн болбойт деп ойлойм", - деди вице-мэрдин милдетин аткаруучу.
Сазыкуловдун айтымында, келерки жылы Бишкекте 1300 жаңы автобус каттамга чыгат.
"1000 автобустун 250сү келди. Жылдын аягына чейин дагы 500-600 автобус келет, ошентип шаарга 800 жаңы автобус келет. Калган 500 автобус кийинки жылдын биринчи кварталында келет", - дейт.
Эске салсак, мэрия жол кирени көтөрүү үчүн ченемдик укуктук документтерди иштеп чыгууну баштаган. Январь айында мэрия тарифти жогорулатуу тууралуу айтып, бирок жарандардын нааразычылыгынан улам бул маселе кийинкиге жылдырылган.
