Кримавторитет Казак менен шериги СИЗОдон чыкты
Ошто опузалап талап кылууга шектелип кармалган уюшкан кылмыштуу топтун Казак каймана аттуу мүчөсү менен шериги СИЗОдон чыкты. Kaktus.kg`ге Ош ШИИБден билдиришкендей, тиешелүү чечимди сот чыгарды.
"Казак жана анын шериги 30-майда Ош шаардык соту тарабынан жашаган жеринен алыска чыкпоо шарты менен бошотулду. Алар СИЗО-5те отурушкан. Ош шаардык сотунун чечимине милиция комментарий бербейт", - дешти шаардык башкармалыктан.
Ош ШИИБдин кызматкерлери тарабынан май айында 1981-жылы туулган М.У. (каймана аты "Казак") жана анын кылмыштуу шериги - 1978-жылы туулган Ж.А. кармалышкан. Экөө теӊ мурда бир нече ирет соттолушкан.
Кармалгандар 2022-жылы Бишкек шаарынын 36 жаштагы тургунунун Toyota Camry 70 (чыккан жылы 2020) унаасын коркутуу жолу менен тартып алышып, Ош шаарында башка жаранга сатып жиберишкен.
Бул факты боюнча 208-берене ( опузалап талап кылуу) менен кылмыш иши козголуп, тергөөнүн жүрүшүндө шектүүлөр Ош шаарындагы SKY-bar түнкү клубунда кармалып, убактылуу кармоочу жайга киргизилген.
Башкы беттеги сүрөт иллюстрациялык.
