Жол кырсыгынан улам комага түшкөн окуучу үйүнө чыкты
"Манас" аэропортунун трассасында жол кырсыгына кабылып, комага түшкөн окуучунун ден соолугу жакшырып, 20-майда ооруканадан чыкты. Маалыматты Kaktus.kg сайтына №3 балдар клиникалык ооруканасынын башкы дарыгери Акылбек Маманов билдирди.
"Окуучуга 2 операция жасалды: алгач ээгине, андан кийин сан сөөгүнө. Хирургиялык процедурадан кийин бейтап 10 күндөй ооруканада болду. Саламаттыгы канааттандырарлык болуп, 20-майда үйүнө чыгарылды. Ошол жол кырсыгында жаракат алып кайрылган бейтаптардын баары бүгүнкү күндө ооруканадан чыгышты", - дейт адис.
Эске салсак, 20-апрелде окуучуларды ташыган автобус кырсыкка кабылып, 18 бала ооруканага жаткырылган. Анын ичинен 4 баланын абалы оор болуп, жандандыруу бөлүмүндө жатканы кабарланган. Кийинчерээк шаардык №3 балдар клиникалык ооруканасынын башкы дарыгери Акылбек Маманов Kaktus.kg сайтына жалпы 27 бала кайрылганын билдирген.
Чүй ОИИББден жол кырсыгы боюнча кылмыш иши козголуп, тергөө башталганын кабарлаган.
