"Бүтүн Кыргызстан" фракциясы Министрлер кабинетин таратууну сунуштады
"Бүтүн Кыргызстан" фракциясы Акылбек Жапаров баштаган Министрлер кабинетин таратууну сунуштады. Мындай документти фракция 26-апрелде Жогорку Кеңештин кароосуна жөнөттү.
Фракция лидери Адахан Мадумаровдун айтымында, буга Конституциянын 44-беренесинин 2-бөлүгүндө көрсөтүлгөн пенсия, социалдык жөлөк пулдар жана башка социалдык жардамдар мыйзамда белгиленген жашоо минимумунан төмөн эмес деңгээлде камсыздалышы керек деген талаптардын сакталбаганы себеп болгон.
Мадумаров Kaktus.media сайтына "Бүтүн Кыргызстан" фракциясы Конституциялык сотко президент Садыр Жапаровдун Элдик курултайды чакыруу жөнүндөгү жарлыгын Конституцияга каршы келет деп табууну өтүнгөнүн эске салды.
"Ишмердүүлүгү Конституциялык мыйзам менен аныктала турган Курултай жарлыктын негизинде чакырылган, мындай Конституциялык мыйзам жок. Ошондуктан Курултайды чакыруу мыйзамсыз. Конституциялык сот президенттин жарлыктарынын Конституцияга шайкештигин текшермек, бирок али карала элек, эки айдан ашык убакыт өттү.
Министрлер кабинети пенсиялар жана жашоо минимумунун өлчөмү боюнча Конституциялык сотко кайрылган. Сот бул маселени ыкчам карап, пенсиялардын, социалдык жөлөк пулдардын жана башка социалдык жардамдардын өлчөмү экономиканын абалы жана мамлекеттин мүмкүнчүлүктөрүнө түздөн-түз көз каранды болбоосу мүмкүн экенин белгиледи. Конституциялык сот Министрлер кабинетинин билдирүүсүн кайталаган чечим чыгарды.
Конституцияда мындай деп айтылат: пенсиялар, социалдык жөлөк пулдар жана башка социалдык жардамдар мыйзамда белгиленген жашоо минимумунан төмөн эмес жашоо деңгээлин камсыз кылат. Бүттү. Анда экономиканын абалы тууралуу сөз жок", - деди Мадумаров.
