Гаагадагы эл аралык сот Владимир Путинди камакка алууга ордер берди
Гаагадагы Эл аралык кылмыш соту Россиянын президенти Владимир Путинди, ошондой эле балдардын укуктары боюнча акыйкатчы Мария Львова-Белованы камакка алууга эл аралык ордер берди. Бул тууралуу соттун сайтында жазылган.
"Бүгүн, 2023-жылдын 17-мартында Эл аралык кылмыш сотунун экинчи соттук коллегиясы Украинадагы кырдаалга байланыштуу эки адамды: Владимир Путин менен Мария Львова-Белованы камакка алууга ордер берди",-деп айтылат сайтта.
Маалыматка ылайык, Владимир Путин менен Мария Львова-Белова "калкты (балдарды) мыйзамсыз депортациялоо жана Украинанын оккупацияланган аймактарынан Россиянын аймагына калкты (балдарды) мыйзамсыз өткөрүп берүү боюнча аскердик кылмыш үчүн жооптуу" деп жазылган.
"Владимир Путин жогоруда аталган кылмыштар үчүн, түздөн-түз, башка адамдар менен биргелешип жана/же башка адамдар аркылуу аракеттерди жасагандыгы үчүн жекече кылмыш жоопкерчилигине тартылат деп айтууга негиздүү негиздер бар",- деп билдирүүдө айтылат.
Буга чейин Бириккен Улуттар Уюмунун иликтөө комиссиясы украин балдарын Россияга алып кетүү - согуш кылмышы катары каралышы мүмкүн экенин билдирген.
