Прокуратура: "Кумтөрдөгү" коррупция боюнча 642 млн. сом өндүрүлдү
"Кумтөр" ишканасындагы коррупциялык ишти иликтөөдө мамлекетке 642 млн. сом өндүрүлдү.
Бул тууралуу башкы прокурордун орун басары Үмүткан Коңкубаева Жогорку Кеңештин 16-марттагы жыйынында айтты. Ал "Кумтөр" компаниясындагы коррупция боюнча 9 адамга айып коюлганын билдирди.
"Төрт кылмыш иши териштирилип жатат. Айып коюлгандар: Рысбек Токтогулов, Тенгиз Бөлтүрүк, Канат Курманов, Руслан Енгалычев айыпкер катары өтүүдө. Келтирилген зыян 1 млрд. 146 млн. сом. Анын ичинен 56% же 642 млн. сом өндүрүлдү. Мунун 152 млн. сому акчалай, 490 млн. сому накталай. Бул каражат тергөөнүн жүрүшүндө шектүүлөрдөн алынган", - деди ал.
16-мартта Жогорку Кеңеш "Кумтөр" компаниясынын ишин иликтеген депутаттык комиссиянын корутундусун угуп, токтом долбоорун кабыл алды.
"Кумтөрдөгү" коррупция боюнча Башкы прокуратура 2022-жылы сентябрда кылмыш ишин козгогон.
